Pas kritikave të Komisionit të Venecias për ligjet e asaj që njihet si “Paketa Antishpifje”, kanë reaguar edhe një grup organizatash të shoqërisë civile të cilat e kanë kundërshtuar vazhdimisht miratimin e kësaj pakete.
Ato vërejnë se të gjitha shqetësimet e ngritura që nga dhjetori i vitit 2018, kur drafti i parë u propozua nga Këshilli i Ministrave e deri më 19 dhjetor 2019, kur ndryshimet në ligje u miratuan në Kuvendin e Shqipërisë, janë konfirmuar si shqetësime madhore për lirinë e shprehjes, për demokracinë dhe shtetin e së drejtës nga opinioni i Komisionit të Venecias.
Ata i kanë bërë thirrje kryeministrit Edi Rama si nismëtar i këtij ligji dhe shumicës parlamentare, që të pranojnë opinionin e Venecias si përfundimtar dhe shterues dhe rrjedhimisht, të tërheqin ligjin në fjalë.
Organizatat e shoqërisë civile e cilësojnë këtë si një mundësi që qeveria të reflektojë publikisht mbi konceptet dhe praktikat e tyre të gabuara mbi lirinë e shprehjes. /Euronews.al/