Organizata për Rritjen e Cilësisë në Arsim (ORCA) ka mbajtur këtë të mërkurë një aksion protestues “Kthimi i trurit apo kapja e Universitetit?”, para Ministrisë së Arsimit lidhur me “parregullsitë në avancime akademike dhe ndërhyrjet e grupeve të interesit në Universitetin e Prishtinës”.
Përmes këtij aksioni, ata shfaqen pakënaqësitë lidhur me emërimet në pozita të ndryshme akademike në UP.
Rron Gjinovci nga kjo organizatë u shpreh se ministrja e Arsimit, Arbërie Nagavci e ka pasur të gatshme biografinë e rektorit Qerim Qerimi, sepse sipas tij, që nga fillimi e ka ditur se kush do ta marrë postin e rektorit.
Ai ndër të tjera tha se për të gjitha dështimet e Universitetit të Prishtinës do të marrë përgjegjësi qeveria aktuale.
Sipas tij, janë bërë manipulime me zgjedhjen e pozitave të profesorëve e asistentëve.
“Dështimet në Universitetin e Prishtinës do t’ia faturojmë kryeministrit Albin Kurti dhe vartësve të tij, të cilët të papenguar nga ai, po veprojnë jo më ndryshe se regjimi i kalum, që e ka sjellë arsimin në gjendje të mjerueshme”, tha Gjinovci. /Telegrafi/
