Oklahoma City Thunder ka bërë punë të jashtëzakonshme në ditën e fundit të afatit kalimtar të lojtarëve, por po aq mirë marrëveshjet i ka realizuar edhe Toronto Raptors.
Oklahoma që po vuan për lojtarë kualitativ përreth Westbrookut më në fund ka lëvizur në drejtimin e duhur, duke arritur një marrëveshje sensacionalë shkëmbimi me Chicago Bulls.
Oklahoma ia jep Chicagos plejmejkerin Cameron Payne, Anthony Morroë dhe qendrën Jofrey Lauvergne teksa merr dy lojtarë shumë të rëndësishëm si Doug McDermott dhe Taj Gibson të cilët pritet t’i ndihmojnë shumë Westbrookut në fund të sezonit dhe në playoff, shkruan Telegrafi.
Oklahoma po ashtu do ta ketë edhe zgjedhjen e lojtarit të Chicagos në raundin e dytë të draftit në vitin 2018.
Një marrëveshje fenomenale në momentet e fundit të afatit kalimtar ka arritur edhe Toronto Raptors.
Skuadra kanadeze ka arritur të sigurojë shërbimet e PJ Tucker i cili është specialist i pozitës 3 dhe 4, teksa për të ka dhënë Jared Sullingerin dhe dy lojtarë të raundit të dytë në draft të cilët shkojnë në drejtim të Phoenix Suns.
Tucker është lojtari i dytë që merr Toronto Raptors pas transferimit të Ibakas dhe tash pesëshja e parë e klubit kanadez është shndërruar në një pesëshe të frikshme për LeBron James, pasi pikërisht Tucker do të kujdeset për të në playoff, aty ku Toronto dështoi vitin e kaluar. /Telegrafi/