Numri i vdekjeve nga Covid-19 ka rënë me 95 për qind që nga fillimi i vitit, njoftoi sot Organizata Botërore e Shëndetësisë (OBSH), duke paralajmëruar se virusi nuk është zhdukur.
Sipas OBSH-së, virusi nuk do të zhduket shpejt dhe vendet në mbarë botën duhet të mësojnë se si të menaxhojnë pasojat e tij jashtë situatave emergjente, siç janë pasojat që ndjejnë njerëzit e infektuar me të ashtuquajturin Covid të gjatë.
Tedros Adhanom Ghebreyesus, drejtor i OBSH-së, shtoi se një në dhjetë infeksione kanë simptoma afatgjata të Covid-it, që do të thotë se qindra miliona njerëz mund të kenë nevojë për trajtim afatgjatë.
Megjithatë, “ne tërheqim optimizëm nga rënia e vazhdueshme e numrit të vdekjeve të raportuara nga Covid, të cilat kanë rënë me 95 për qind që nga fillimi i këtij viti”, theksoi ai në konferencën për shtyp.
“Por në disa vende virusi po përhapet përsëri dhe në katër javët e fundit 14,000 njerëz kanë vdekur”, tha ai.
Sipas tij, siç tregohet nga shfaqja e variantit XBB.1.16, “virusi vazhdon të ndryshojë dhe është ende i aftë të shkaktojë një valë të re infeksioni dhe vdekjeje”.
Maria Van Kerkhove, e cila është përgjegjëse për luftën kundër Covid në OBSH, tha se varianti XBB dhe nënvariantet e tij tani janë të përhapura në mbarë botën.
Kreu i OBSH-së theksoi sërish se organizata e tij nuk i humb shpresat për të shpallur fundin e urgjencës së shëndetit publik për shkak të Covid-19. Takimi tjetër tremujor i OBSH-së për këtë temë është planifikuar të mbahet në maj. /Telegrafi/