Ende nuk është vërtetuar nëse njerëzit mund të infektohen me coronavirus duke prekur sipërfaqet ku virusi qëndron, të tilla si doreza, tastierë, mausi i kompjuterit, paralajmëroi sot Organizata Botërore e Shëndetit (OBSH).
Sidoqoftë, rekomandohet që njerëzit të dezinfektojnë sendet, sipas udhëzimeve të lëshuara nga kjo agjenci e KB-së, transmeton Telegrafi.
Udhëzimet u nxorën bazuar në një studim që tregon se virusi mund të mbijetojë në pjesën e jashtme të një maskë mjekësore për fytyrën deri në shtatë ditë.
Por OBSH gjithashtu tha që studimet mbi qëndrueshmërinë e virusit duhen parë me një dozë dyshimi, duke pasur parasysh që një hulumtim i tillë kryhet në laboratorë, ku ka pak ngjashmëri me kushtet e jetës reale.
Edhe pse deri më tani nuk ka raportuar raste të infeksionit njerëzor me virusin nëpër sipërfaqe, mundësia e një transmetimi të tillë nuk duhet të përjashtohet duke pasur parasysh sjelljen e coronavirusëve të tjerë të njohur. Kjo është arsyeja pse është e rëndësishme të dezinfektoni sipërfaqet e objekteve si pajisjet elektronike dhe parmakët, thotë OBSH. /Telegrafi/