OBRM-PDUKM-ja përmes kumtesës së rregullt thekson se përmes rebalancit të buxhetit LSDM shkurton 5,6 milionë denarë për ndërtimin dhe mirëmbajtjen e kopshteve për fëmijë. Në këtë mënyrë sipas tyre, LSDM tregon edhe një herë pakujdesi dhe jopërgjegjësi, përcjell Telegrafi Maqedoni.
“Dy muaj LSDM është në pushtet, ndërsa qytetarët shikojnë vetëm shkurtime, shfuqizime dhe bllokime. Fondet e shkurtuara nga kopshtet, është e qartë se nuk kanë mjaftuar për mbulimin e punësimeve të reja të aktivistëve partiak”, thuhet në kumtesën e OBRM-PDUKM-së.
Nga kjo parti thonë se në programin për 2017-2020 kanë planifikuar ndërtimin e 140 kopshteve për fëmijë, me çka sipas tyre do të zgjidhej problemi i fëmijëve që nuk kanë mundur të regjistrohen në kopshte për shkak të kapaciteteve të vogla.
OBRM-PDUKM-ja në fund thekson se për shkak të pakujdesisë dhe papërgjegjësisë, LSDM-ja në fund do të ballafaqohet me përgjegjësi politike./Telegrafi/