OBRM-PDUKM-ja përmes një kumtese me shkrim njofton se LSDM-ja dhe Zoran Zaevi nuk mund të bëjnë tregti me interesat më të larta shtetërore dhe kombëtare vetëm për të shpëtuar dhe të mos përgjigjen për krimet e bëra. Sipas OBRM-PDUKM-së, LSDM-ja me pranimin e Deklaratës së partive shqiptare, Maqedoninë e çon drejt procesit të federalizimit, përcjell Telegrafi Maqedoni.
“Pranimi i Deklaratës së Tiranës, u vërtetua edhe nga deputeti i tyre Muhamed Zekiri, i cili publikisht dhe qartë para një përfaqësuesi të BDI-së tha se LSDM-ja si parti pajtohet me gjithë pikat e Deklaratës. OBRM-PDUKM-ja kundërshton realizimin e Deklaratës së Tiranës dhe për këtë arsye nuk nënshkruan marrëveshje për qeverinë e re, për shkak se asnjëherë nuk do të lejojë që shteti të humb atributet e shtetit unitar dhe multietnik”, thuhet mes tjerash në kumtesën e OBRM-PDUKM-së.
Nga kjo parti gjithashtu kanë përsëritur qëndrimin e tyre për zgjedhje të reja dhe LSDM-ja Deklaratën e Tiranës ta nxjerr para qytetarëve për ta votuar./Telegrafi/