“Shtëpia e plumbave” është një ndër objektet e pakta që i ka mbijetuar luftës së fundit në Kosovë, objekt ky i cili gjendet në fshatin Meqë të Komunës së Gjakovës, shtëpi për të cilën Telegrafi kishte raportuar ditë më parë.
Ndërsa, pak metra larg “Shtëpisë së plumbave”, përkatësisht në fshatin Cërmjan, gjendet edhe një objekt i cili deri para luftës ishte funksional si shtëpi dhe restorant.
Në një intervistë për Telegrafin, pronari i këtij objekti, Argjent Avdiu, na foli më shumë rreth historikut të ndërtimit të objektit, dhe se për çfarë ka shërbyer ky objekt.
“Ky objekt është i ndërtuar në vitet e 80-ta dhe në fillim ka shërbyer si lokal, por pak vite para luftës ka shërbyer edhe për banim. Gjatë kohës së luftës, ky objekt ka qenë i boshatisur, sepse me shtëpia kemi kaluar pastaj në një lokacion tjetër, kurse ky objekt ka qenë i rregulluar dhe nuk ka pasur dëmtime, mirëpo dëmtimet që shihen këtu, objekti i ka pësuar gjatë luftës”, tha fillimisht Avdiu.
Ai po ashtu potencoi që rëndësia e këtij objekti ka qenë e madhe për ta, pasi paraqet mundin që është bërë për ndërtimin tij.
“Për ne ka pasur rëndësi të madhe ky objekt sepse ka qenë një mund shumë i madh që ky objekt të ndërtohet në atë kohë, dhe me shkatërrimin e objektit gjithë ajo pasuri të cilën e kemi pasur me mund, u dogj”, u shpreh tutje Avdiu.
Rëndësia e objektit në fjalë ka qenë edhe ekonomike, sepse sipas Avdiut, ky objekt ka funksionuar si një restorant.
“Ka pasur vështirësi sepse ky ka qenë një burim i yni, sepse si restorant që kë qenë dikur ne kemi pasur të ardhura prej tij, kemi jetuar përmes tij. Mirëpo pas luftës nuk patëm mundësi që të ri-ndërtojmë”, tha Avdiu ndër të tjera.
Më poshtë mund ta ndiqni rrëfimin e plotë. /Telegrafi/
