Presidenti i Shteteve të Bashkuara, Barack Obama e ka akuzuar homologun e tij rus, Vladimir Putin se ka shkatërruar ekonominë ruse, duke u munduar që të rikrijojë lavditë e perandorisë ruse.
Në një nga retorikat më të ashpra në samitin e grupit të shtatë vendeve më të industrializuara G7, Obama në një konferencë për media, tha se populli rus po vuan shumë për shkak të Putinit.
“Siç e kemi parë edhe në ditët e kaluara, forcat e armatosura ruse vazhdojnë të operojnë në lindje të Ukrianës, duke shkelur sovranitetin dhe integritetin territorial të Ukrainës”, tha Obama.
“Rusia është në recension të thellë. Prandaj veprimet e Rusisë në Ukrainë janë duke e lënduar shtetin dhe popullin rus”, tha ai.
“Menjëherë kjo do të jetë një problem për zoti Putin. Ai duhet të marrë një vendim”.
“Ai do të vazhdojë të rrënojë ekonominë e vendit të tij dhe do të vazhdojë izolimin e Rusisë për shkak të dëshirës jo të mirë për të rikrijuar lavditë e perandorisë sovjetike, ose a e njeh ai që madhështia e Rusisë nuk varet nga shkeljet e integritetit dhe sovranitetit në vendet e tjera”, tha Obama.
Më shumë sanksione do t’i vendoset Rusisë, nëse Putin nuk ndryshon qasjen, ka thënë Obama.“Nëse Rusia, punon me separatistët, rritë agresionin brenda Ukrainës”, atëherë Shtetet e Bashkuara dhe Bashkimi Evropian do të rrisin sanksionet e tyre, ka thënë Obama.
Ndërkaq, Kremlini nuk është përgjigjur drejtpërdrejtë akuzave të Obamas, por ka luajtur me mungesën e Putinit në samitin e G7-ës, duke thënë se Putin preferon “formate të tjera”, ku në mënyrë më efektive mund të balancohet fuqitë botërore ekonomike.
“Është e pamundur që tash të marrim shtatë ose tetë njerëz dhe në mënyrë efektive të diskutojmë për problemet globale”, citon agjencia e lajmeve RIA zëdhënësin e Kremlinit, Dimitry Peskov./Rel/Telegrafi/