Sulmuesi i Barcelonës, Raphinha, ka diskutuar për qëndrimin e tij në fushë, duke thënë se nuk i pëlqen të humbasë në asnjë rrethanë.
Braziliani që ka qenë shpesh kapiten te Barcelona, ka deklaruar se mundohet t’i ndihmojë të gjithë në klub.
“Nuk më pëlqen të humbas në fushë, nuk më pëlqen të humbas në shtëpinë time. Nëse jam duke luajtur një lojë letrash ose një lojë tavoline me miqtë e mi, nuk më pëlqen të humbas, zemërohem shumë”.
“Unë jam dikush që nuk mund t’i përballoj shumë mirë humbjet. Natyrisht, e di që është e natyrshme të humbasësh në futboll, kjo ndodh. Por e urrej humbjen”.
“Fakti që nuk e pranoj humbjen mund të më ndihmojë të përpiqem gjithmonë për fitoren dhe të përfundoj duke shfaqur një lloj lidershipi brenda dhe jashtë fushës”.
“Mundohem t’i ndihmoj të gjithë sa më shumë që të mundem brenda dhe jashtë fushës dhe gjithmonë do të luftoj për lojtarët e mi dhe për klubin tim, sepse kjo është e natyrshme për mua”, ka thënë Raphinha. /Telegrafi/