Pas 11 orë diskutimesh në seancën e jashtëzakonshme, Kuvendi i Kosovës nuk ka arritur të miratojë rezolutën për ndalimin në Francë të kryetarit të AAK-së, Ramush Haradinaj.
Dy rezolutat e prezantuara, një e sponsorizuar nga AAK dhe e mbështetur nga Vetëvendosje dhe Nisma, dhe tjetra e prezantuar nga grupet parlamentare PDK-LDK, nuk kanë arritur të marrin votat e nevojshme.
Pas pauzës së dytë që u mbajt, për harmonizimin e tekstit të rezolutës, kryetari i Kuvendit të Kosovës, Kadri Veseli, theksoi se nuk është arritur pajtueshmëri për një rezolutë të përbashkët. Ai njoftoi se do të hidhen në votim tekstet e dy projektrezolutave.
Shefi i Grupit Parlamentar të AAK-së, Pal Lekaj, theksoi se rezoluta e dytë është plagjiaturë e rezolutës së tyre, pasi të tri pikat e para janë marrë nga teksti i tyre ndërsa është shtuar vetëm teksti për raporte të mira me Francën.
E para në votim u hodh rezoluta e prezantuar nga AAK, në të cilin votim nuk mori pjesë pozita. Për të votuan 36 deputetë, pro së cilës ishin 28, tre kundër dhe pesë abstenuan.
Kurse, për tekstin e prezantuar nga PDK-LDK, votuan 47 deputetë, pasi opozita e lëshoi sallën. 38 ishin për, gjashtë kundër dhe tre abstenime.