SHBA-ja u shpreh e shqetësuar për fatin e liderit opozitar rus, vendndodhja e të cilit nuk dihet ende.
“Ne jemi thellësisht të shqetësuar për vendndodhjen e Alexei Navalny, i cili është zhdukur në sistemin e burgjeve të Rusisë për gati tri javë”, tha Sekretari amerikan i Shtetit, Antony Blinken.
“Ne bëjmë thirrje edhe një herë për lirimin e menjëhershëm të tij, për t’i dhënë fund shtypjes së vazhdueshme të zërave të pavarur në Rusi”, shtoi ai, transmeton Telegrafi.
We are deeply concerned about the whereabouts of Aleksey Navalny, who has now been missing in Russia’s prison system for nearly three weeks. We once more call for his immediate release and an end to the continued repression of independent voices in Russia.
— Secretary Antony Blinken (@SecBlinken) December 23, 2023
Edhe ekspertja e OKB-së, Mariana Katzarova, shprehu shqetësim për “zhdukjen e detyruar” të Navalny, për të cilin thuhet se së fundmi është parë në një burg afër Moskës.
Mungesa e përditësimeve rreth vendndodhjes së tij, mund të nënkuptojë se ai po transferohet në një burg më të ashpër, proces ky që mund të zgjasë me javë të tëra.
Ekipi i Navalny, ka thënë se transferimi i tij i mundshëm në një burg tjetër, është caktuar qëllimisht pasi Kremlini po përgatitet për zgjedhje të reja, shkruan yahoonews.
Navalny, 47 vjeç, kundërshtari kryesor politik i Putinit, u ndalua të kandidojë në zgjedhjet e vitit 2018, për shkak se u akuzua për mashtrim.
Në vitin 2021, ai u dënua me 19 vjet burg nën akuzën e “ekstremizmit”, pasi i mbijetoi një tentative helmimi, për të cilën e fajësoi Putinin.