Pronarët e kompanive të transportit të udhëtarëve për rajonin e Anamoravës nuk po e respektojnë vendimin e djeshëm të Ministrisë së Infrastrukturës dhe Ambientit, për operim me kufizime.
Ata që nga sot kanë hyrë në grevë, për shkak se sipas tyre, operimi me kufizime u shkakton humbje.
Kryetari i Shoqatës së transportit të udhëtarëve Anamorava, Rexhep Sejdiu, ka thënë për Mediafokus.info se nuk mund të kthehen në punë, pasi sipas tij, kjo nuk është e leverdishme në këtë fazë.
“Kushtet që na janë vënë nga Ministria e linjës për neve janë humbje e trefishtë. Obligimi i dezinfektimit të autobusëve tri herë ne ditë, operimi me kapacitet të udhëtarëve prej 50 për qind dhe pajisja me maska e dezinfetues, për neve janë të papërballueshme”, ka thënë ai për Mediafokus.info.
Gjatë ditës ka operuar vetëm kompania Mimoza 93, por që sipass Sejdiut, edhe ajo nga e mërkura do t’i nënshtrohet grevës.
“Vendimin e kemi marrë me vonesë, jemi njoftuar përmes internetit, pra Shoqatës nga Prishtina. Ata vendimin e kanë bërë ad hoc pa u konsultuar me neve fare. Ne jemi 47 kompani që operojmë në Anamoravë me rreth 450 të punësuar. Plus asaj, nuk jemi subvencionuar fare”, ka thënë ai.
Ndëkohë, kryeshefi i ndërmarrjes Stacioni i Autobuëve në Gjilan, Avni Hajrullahu, ka thënë se si ndërmarrje janë të gatshëm t’iu ofrojnë shërbime kompanive, duke respektuar rekomandimet e IKSHP për mbrojtje nga Covid-19
Ndryshe, kryetari i Shoqatës së transportit e udhëtarëve Anamorava, Rexhep Sejdiu, ka thënë se do të vazhdojnë me grevë, deri në një vendim të përshtatshëm për ta nga ana e Ministrisë së Infrastrukturës dhe Ambientit.