Policia franceze ka njoftuar se ka ndaluar mbajtjen e protestës “konvoji i lirisë” në Paris, që ishte planifikuar të mbahet nga 11 deri më 14 shkurt, ku duket se janë inspiruar nga protestat e shoferëve të kamionëve në Kanada që po kundërshtojnë masat anti-COVID.
Demonstruesit u nisën për në jug të Francës në të ashtuquajturën “konvoji i lirë” në drejtim të Parisit, ku planifikonin të kërkonin fundin e masave epidemiologjike.
Organizatorët kanë thënë se nga e premtja mbrëma “do të bllokonin kryeqytetin francez”, transmeton Telegrafi.
“Do të aplikohen masa të veçanta që të parandalohet bllokimi i rrugëve, duke dënuar dhe arrestuar shkelësit e ligjit”, thuhet në kumtesën e kësaj komune.
Rreth 200 demonstrues janë mbledhur në një parking në Nice, ku shumica prej tyre kanë ngritur flamujt kanadez në shenjë përkrahje për shoferët e atjeshëm të kamionëve, që po protestojnë kundër masave anti-COVID.
“Organizatori i demonstratave të ndaluara mund të dënohet me gjashtë muaj burgim dhe 7.500 euro”, paralajmërojnë autoritetet franceze – duke shtuar se dënimet janë të parapara edhe për pjesëmarrësit në protestë. /Telegrafi/