Nominimi për Çmim Nobel për Paqe të Feride Rushitit dhe QKRMT-së është vlerësim për Kosovën, konsideron drejtoresha e kësaj organizate. Ajo tha se është e natyrshme që Serbia do të reagojë, meqë ende nuk ka pranuar krimet e luftës në Kosovë. Drejtoresha Feride Rushiti pret që institucionet të luajnë rolin e tyre në lobim.
Qendra Kosovare për Rehabilitimin e të Mbijetuarve të Torturës (QKRMT) dhe drejtoresha Feride Rushiti janë nominuar për Çmimin Nobel për Paqe 2025. Kjo është bërë me propozimin e deputetit të parlamentit suedez, Magnus Jacobsson.
Para mediave, drejtoresha Rushiti tha se shpreson që ky nominim do të rris zërin ndërkombëtarisht të viktimave të dhunës seksuale.
“Ky nominim ka ardhur në befasi fare. Realisht unë jam takuar me personin të cilin na ka nominuar, deputetin suedez, Jacobsson para dy viteve në një takim të rastësishëm, i cili po vinte në Kosovë për t’i takuar qoftë politikanët, qoftë organizatat e shoqërisë civile dhe aty gjatë një ore kam pasur mundësinë për të shkëmbyer përvoja, për të ndarë zhvillimet aktuale në QKRMT, por edhe sfidat dhe vështirësitë që ne i hasim në terren…
Çfarë nënkupton ky nominim për mua personalisht edhe për QKRMT-në: mendoj qe është një vlerësim jo vetëm për ne si organizatë, për punën dhe kontributin tonë tash 25-vjeçar në kauzën për të mbijetuarit e dhunës seksuale, por është një vlerësim për Kosovën që i bëhet me këtë nominim”, tha ajo.
Marrë parasysh kauzën e kësaj qendre, Rushiti tha se pret që Serbia do të tentojë të pengojë këtë proces.
“Me Serbinë ne natyrisht kemi pasur edhe shqetësime të tjera. Më kujtohet edhe libri ‘Unë dua të dëgjohem’ kur është tentuar t’i jepet presidentit serb dhe nuk e ka pranuar, pastaj as publikimi i këtij libri nuk është publikuar për shkak të natyrës edhe tregimeve që përmban ky libër në raport me krimet e luftës. Është e natyrshme reagimi i tyre në këtë fushë për faktin që ata ende nuk i njohin krimet e luftës dhe nuk ka asnjë lëvizje në këtë drejtim”, shtoi ajo.
Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti tha se pret nga institucionet që të lobojnë në këtë proces.
“Është një proces i ri për neve, është një nominim i ri fare i ri për neve. Ne sot jemi zgjuar me ato emocionet e gëzimit por besoj që institucionet duhet ta luajnë rolin e vet të rëndësishëm sikurse edhe nëpër mekanizma të tjerë. Është edhe fushatë zgjedhore dua të potencojë që kanë prioritetet e veta. Kam pranuar shumë urime dhe përkrahje dhe politikanët kanë shprehur gatishmëri. Uroj dhe shpresoj që edhe ata të shohin si vlerësim për Kosovën jo për KRCT-në dhe mua personalisht, por një vlerësim për kauzën dhe për krimet e luftës”, përfundoi ajo.
Në vitin 1979, Nënë Tereza kishte marrë Çmimin Nobel për Paqe në Oslo të Norvegjisë. /KP/Telegrafi/