Njësia Speciale Intervenuese (NJSI) e Policisë së Kosovës, e njohur më parë si FIT është vendosur në kampin Belvedere afër Mitrovicës dhe janë në gjendje gatishmërie, raporton Telegrafi.
Sipas burimeve të Telegrafit, Njësia Speciale është në gjendje të gatishmërie dhe disa pjesëtarë të saj ndodhen në Gazimestan, të tjerët në rajonin e Mitrovicës.
Ndryshe, sot serbët po festojnë Vidovanin. Për këtë ftesë ministri i Mbrojtjes i Serbisë, Aleksander Vulin ka paralajmëruar hyrjen në Kosovë. Por autoritetet e Kosovës nuk ia kanë dhënë lejen për hyrje për shkak të deklaratave të tij nacionaliste.
Madje, Jetlir Zyberaj, këshilltar i ministrit të Punëve të Jashtme, Behgjet Pacollit ka paralajmëruar se hyrja ilegale e kujtdo në territorin e Kosovës do të pasohet me zbatimin e ligjit nga Policia e Kosovës.
Zyberaj ka paralajmëruar se nëse Vulin hyn në Kosovë ai do të arrestohet.
“Secili provokim që mund të bëhet, pasojat do t’i bartë Beogradi ngase provokime të tilla i bën qëllimshëm. Partnerët ndërkombëtarë janë të njoftuar për secilin veprim tonin. Përtej konspiracioneve që rëndom prodhohen pastaj, është shumë e qartë se futja ilegale e kujtdo në territorin e Kosovës, nënkupton zbatim të ligjit nga Policia e Kosovës”, shkruan Zyberaj në Facebook. /Telegrafi/
