Filmi shqiptar “Njerëz dhe Fate 2” që theu rekord shikueshmërie në Shqipëri fillon të shfaqet në ekranin e madh të Cineplexx Prishtinë dhe Cineplexx Prizren nga sot më 21 Nëntor.
Telenovela e parë shqiptare “Njerëz dhe Fate” e mbajti ‘të mbërthyer’ publikun, jo vetëm se ishte risi, por edhe për shkak të historisë që ajo kishte, duke pasqyruar realitetin shqiptar të asaj kohe.
Historia tragjike e një familjeje shqiptare që përballej me vështirësitë e asaj kohe, si dhuna në familje, trafikimi apo droga, tërhoqi vëmendjen e shqiptarëve që hasnin të njëjtat probleme të asaj kohe.
Pas më shumë se dy dekadash, “simboli” i viteve 2000-2003 rikthehet në kinematografi, këtë herë si film dhe jo si serial. Të gjithë jemi kuriozë të dijmë se si do të vazhdojë rrjedha e historisë së lënë përgjysmë 20 vite më parë.
Subjekti i filmit tregon ekstradimin e Florian Gurit (Arben Derhemi) në Tiranë. Ai rikthehet në qytet për të bërë lëmsh jetët e familjarëve të tij dhe për të vënë në vend drejtësinë. E motra, Era (Eni Jani), tanimë është e martuar me Tonin (Gentian Zenelaj) dhe kanë sjellë në jetë një bebushe. Gjithashtu, janë prindër të një djali adoleshent. Ndërsa janë duke festuar ardhjen në jetë të vajzës, daja i Erës dhe Florit, i cili njëjtë si në serial luhet nga Alfred Trebicka, u jep lajmin e rikthimit të Florit.
Kështu, ngjarjet nisin të ngatërrohen dhe çuditërisht, të gjithë nisin të flasin për Florin, duke na sjellë një frymë tipike “karakteri kryesor misterioz”, i cili nuk ka një histori specifike të shpjeguar në film, por edhe pas 20 vitesh, me gjithë gjërat që ndodhin vërdallë, mbetet i freskët në memorien e njerëzve.
“Njerëz dhe Fate 2”, thuhet se do të ketë (të paktën) edhe një seri tjetër.
Në Cineplexx Prishtinë janë këto orare: 15:45 18:00 edhe 20:15, ndërsa në Cineplexx Prizren këto orare :18:15 dhe 20:30
Biletat janë në shitje! Biletat mund ti blini përmes:
– Përmes Web-it këtu
– Aplikacionit CineplexxKs
– Fizikisht në kinema