Të paktën një person ka gjetur vdekjen dhe gjashtë të tjerë janë lënduar pasi një vinç ra mbi një kompleks apartamentesh në qendër të qytetit Dallas, sipas zëdhënësit të Njësisë së Zjarrfikësve, Jason Evans.
Sipas mediave të huaja, përcjell Telegrafi, vinçi ra mbi një kompleks apartamentesh të Elan City Lights.
Zjarrfikësit e Dallas kanë përdorur edhe qentë e shpëtimit në skenë për të kërkuar për njerëzit e humbur dhe të plagosur.
Tre pacientë u dërguan në Qendrën Mjekësore të Universitetit Baylor, sipas zëdhënësit të spitalit Deke Jones.
Jones thotë se një pacient është në gjendje kritike, një tjetër është në gjendje të rëndë dhe i treti është trajtuar dhe lëshuar.
Ndërsa tre pacientë të tjerë u dërguan në Parkland Memorial Hospital në Dallas, por një zëdhënëse për Parkland nuk mund të jepte detaje rreth gjendjes së tyre. /Telegrafi/
