Ditën e sotme (e premte) në “Times Square” në New York është vendosur një reklamë e madhe promovuese për artistin shqiptar tashmë me famë ndërkombëtare, DJ Regard.
“Regard, Troye Sivan dhe Tate McRae, kënga e re YOU”, – shkruhej në ‘billboard’ që njëherësh ka bërë krenarë të gjithë shqiptarët duke bërë që të shpërndajnë këtë gjithandej nëpër rrjete sociale.
Reklama, e mundësuar nga platforma Spotify, është vendosur me arsyen e promovimit të këngës së re të Regard të titulluar “You”.
Kjo njëherësh ka të bëjë me bashkëpunimin e DJ kosovar me këngëtarin e kompozitorin australian, Troye Sivan si dhe artisten kanadeze, Tate McRae.
Më parë, në ekranet e “Times Square” janë vendosur edhe sukseset e artisteve të tjera shqiptare si: Rita Ora, Dua Lipa e Bebe Rexha.
Këtij suksesi i është gëzuar edhe vet artisti, i cili ka ndarë pamjen me ndjekësit në llogarinë e tij në Instagram.
“Faleminderit shumë Spotify, kjo është e mahnitshme. You me Troye Sivan dhe Tate McRae është publikuar tanimë në të gjitha platformat”, thuhej në postimin e Regard.
Reagimet gjithashtu kanë qenë të shumta, duke u përkrahur në masë të madhe edhe nga miqtë e fansat e shumtë të Dardan Aliut. /Telegrafi/
