Një vit tjetër, një tjetër padi prej 20 milionë eurosh nga Andy Stone për këngën e Mariah Carey, “All I Want for Christmas Is You”.
Stone, ngriti një padi kundër Carey, bashkë-shkrimtarit Walter Afanasieff dhe Sony Music Entertainment në Distriktin Qendror të Kalifornisë të martën, duke pretenduar “shkelje të të drejtës së autorit” për një këngë – e titulluar gjithashtu “All I Want for Christmas Is You” – që ai shkroi në Nashville dhe u publikua në 1989.
Një padi e ngjashme u ngrit nga Stone dhe bashkë-shkrimtari Troy Powers (i cili është gjithashtu një paditës në çështjen aktuale) në Louisiana qershorin e kaluar përpara se të tërhiqej poshtë pesë muaj më vonë.
Në dokumentet e reja gjyqësore, avokatët e Stone deklarojnë se “All I Want for Christmas Is You” e tij u luajt në radio në vitin 1993 dhe u bë hit në tabelën ‘Hot Country Singles & Tracks’ të Billboard.
Dokumenti pretendon se Carey kopjoi “strukturën kompozicionale” të këngës së Stone të vitit 1989, edhe pse dokumentet gjithashtu pranojnë se shprehja “gjithçka që dua për Krishtlindje je ti” nuk e kishte origjinën Stone.
Avokatët e paditësve pretendojnë se Carey dhe bashkëpunëtorët e saj “pa dyshim kishin akses” në “All I Want for Christmas Is You” të Stone në kohën e shkrimit të këngës së saj homonime “duke pasur parasysh suksesin e gjerë tregtar dhe kulturor”.
Sipas padisë, kërkohet një gjykim nga juria dhe gjithashtu 20 milionë euro dëmshpërblim. /Telegrafi/
