Një tjetër kandidat për sulmin e Milanit tashmë raportohet se është Yusuf Yazici, një lojtar i lirë i cili tashmë ka punuar me Paulo Fonsecan tek Lille, madje kishte shënuar het-trik ndaj Milanit.
Me Olivier Giroud që tashmë ka marrë rrugë për në Amerikë, ‘Rossonerët’ janë në mungesë të një sulmuesi pasi zyrtarisht humbën garën për Joshua Zirkzeen meqenëse refuzuan të paguajnë 15 milionë euro komision për agjentin e tij.
Sipas asaj që raporton Gazzetta dello Sport, ata tashmë kanë kthyer vëmendjen tek Yazici, i cili e ka avantazhin e të qenurit lojtar i lirë pasi kontrata e tij me Lille ka skaduar.
Ai ka luajtur nën urdhrat e trajnerit të ri të Milanit, Paulo Fonseca, sezonin e kaluar duke shënuar 12 gola dhe duke bërë katër asistime në 42 paraqitje.
Reprezentuesi turk është 27-vjeçar dhe tashmë ka lënë shenja në takimin ndaj Milanit në nëntor të vitit 2020, aty ku kishte shënuar het-trik.
Ani pse Yazici mund të luajë si qendërsulmues, ai në fakt shquhet më shumë si trekuartist ose sulmues i djathtë.
Për Yazicin interesim thuhej se kishte shprehur edhe Fenerbahce të cilët jo shumë kohë më parë emëruan Jose Mourinhon në krye të stolit./Telegrafi/