Kosova është gjithashtu në mesin e vendeve “me rrezik të lartë” që mund të përballet me zjarre, sipas të dhënave të përpiluara nga Copernicus, pjesë e programit Hapësinor të Bashkimit Evropian dhe Sistemit Evropian të Informacionit për Zjarret në Pyje.
Parashikimi i sotëm për zjarret sipas Sky News, e ka pozicionuar pjesën më të madhe të Evropës jugore në alarm të kuq, dhe në mesin e tyre figuron edhe Kosova, transmeton Telegrafi.
Sipas hartës, zonat me ngjyrë të gjelbër konsiderohen “me rrezik të ulët” derisa zonat me ngjyrë vjollcë të errët konsiderohen në “rrezik ekstrem”.
Në kuadër të kësaj harte, pjesa qendrore Kosovës është e pasqyruar me ngjyrë të kuqe dhe me ngjyrë vjollcë të errët, gjë që e vendosë atë në rrezik tejet të lartë të mundshëm për t’u përballur nga zjarret.
Ditëve të fundit, vendet sikurse Greqia dhe Italia janë përballur me zjarre ekstreme për shkak temperaturave të larta.
Në Greqi zjarret kanë kapluar ishujt e Rodosit, Korfuzit dhe Evias. Temperaturat pritet të rriten mbi 44 gradë Celsius në pjesë të vendit.
Ndërkaq në Itali, zjarret në Sicili dhe Pulia kanë detyruar evakuimin e mijëra njerëzve. /Telegrafi/