Shefi i Emergjencës në Spitalin Rajonal të Pejës, Besnik Ibraj ka treguar se të enjten është paraqitur një rast pozitiv me virusin COVID-19, në Pejë.
Sipas tij, personi i infektuar është një tregtar ambulator në këtë komunë, ku siç tha ai pas hapjes së bizneseve ekziston frika për rikthimin e virusit.
“Mbrëmë ka rezultuar pozitiv një rast në Pejë. Bëhet fjalë për një tregtar ambulator. Spitali i Pejës i ka marr masat paraprake të rekomanduara nga IKSHPK dhe Ministria e Shëndetësisë. Pas hapjes së bizneseve, ekziston një frikë që mund të rikthehet sërish pandemia, por duhet t’i kemi parasysh masat mbrojtëse”, ka thënë Ibraj.
Ai po ashtu theksoi se duhet të respektohen rekomandimet e IKSHPK-së, pasi virusi është ende prezent, përcjell Telegrafi.
“Kujdesi duhet të ketë i shtuar dhe ti respektojmë rregullat e IKSHPK-së. Virusi është ende në mesin tone, edhe pse siç po shihet fuqia e tij është duke rënë. Puna ka vazhduar normalisht”, ka thënë ndër të tjera, shefi i Emergjencës në Spitalin Rajonal të Pejës, Besnik Ibraj. /RTV Dukagjini/Telegrafi/