E plotësuar: Ambasada e Mbretërisë së Bashkuar e ka konfirmuar se zyrtari i tyre ka pësuar aksident në Brezovicë.
Përmes llogarisë zyrtare në Facebook, thuhet se ai aktualisht po merr tretman mjekësor.
“Mund të konfirmojmë se një anëtar i Ambasadës Britanike është përfshirë në një aksident në malet e Sharrit. Ai aktualisht janë në trajtim mjekësor”, thuhet në njoftim.
Një person dyshohet se është lënduar rëndë në Malet e Sharrit, në Brezovicë.
Telegrafi mëson se i lënduari është diplomat i Ambasadës Britanike në Kosovë.
Gjatë ngjitjes në bjeshkë, ai kishte rrëshqitur duke marrë lëndime trupore.
Shërbimi i Kërkim Shpëtimit Malor, kanë intervenuar për shpëtimin e tij.
“Po, ai ka rrëshqitur gjatë ngjitjes në Malet e Sharrit, duke marrë lëndime trupore. Pas thirrjes për ndihmë, ne kemi intervenuar menjëherë, dhe po ashtu ia kemi dhënë edhe ndihmën e parë”, ka thënë për Telegrafin një anëtar i grupit të Kërkim Shpëtimit Malor.
Ndërkaq, bëhet e ditur se diplimati britanik është transportuar me helikopter për në kampin Bondsteel, për tretman të duhur mjekësor.
“Gjendja e tij është jashtë rrezikut për jetë”./Telegrafi/
