Braziliani, i cili punon si shpërndarës picash në Dublin, ndaloi një sulmues që theri me thikë pesë persona, tre prej të cilëve ishin fëmijë, duke e goditur me helmetë të motoçikletës.
Caio Benicio (43) rrezikoi jetën për të ndihmuar në përfundimin e gjakderdhjes në të cilën pesë persona u plagosën në sheshin Parnell East, pranë shkollës fillore irlandeze, Gaelscoil Cholaiste Mhuire.
“Ishte instinkt i pastër dhe gjithçka përfundoi në sekonda. Ai ra në tokë, unë nuk pashë se ku shkoi thika dhe njerëz të tjerë hynë brenda”, tha ai për The Journal.
Edhe pse pas sulmit filluan trazirat në Dublin të shkaktuara nga informacionet e pakonfirmuara se sulmuesi ishte emigrant, faqja GoFundMe filloi një fushatë bamirësie për emigrantin brazilian, në të cilën deri më tani janë mbledhur 320 mijë euro.
Në fushatën e dytë, 81 mijë euro u mblodhën për punëtoren e çerdhes që mbronte fëmijët dhe ndihmoi në parandalimin e sulmuesit që të arrinte tek ata.
Ndryshe, policia arrestoi 34 persona pas një trazire gjatë natës në të cilën u thyen xhamat e dyqaneve dhe u dogjën veturat dhe autobusët e policisë. /Telegrafi/
