Radiotelevizioni Dukagjini në bashkëpunim me kompaninë PR Solutions, së shpejti fillojnë me emisionin Ninullë.
Emisionet do të kenë përmbajtje informuese dhe edukative për gratë dhe fëmijët, ku praktikisht do të flitet për edukimin që nga periudhat e para fillimit të shtatzënisë e deri te rritja e shëndetshme dhe edukimi i fëmijëve.
Për 45 minuta, do të ofrohen storie të ndryshme nga terreni për tema të ndryshme ku në mënyrë praktike do të demonstrohen nga njerëz adekuat.
E përveç këshillave të doktorëve, do të mund të ndiqni storie nga protagonistë të ndryshëm edhe nga kopshtet, spitalet, farmacitë, sallat sportive e gjithçka tjetër që lidhet me shëndetin e grave dhe fëmijëve.
Storiet që do të realizohen ofrojnë këshilla e informata praktike duke filluar nga periudha para shtatzënisë, çfarë ushtrime fizike duhet te bëjmë, çfarë ushqime duhet të konsumojmë, cilat medikamente duhet t’i shmangim, çfarë duhet të kemi parasysh para lindjes, cilat janë mënyrat e lindjes, cilët janë shkaktaret e aborteve, si duhet të kujdesemi për bebet, e shumë e shumë tema të tjera.
Në çdo emision do të ketë informata për ushqyerjen e shëndetshme si dhe receta të shumta për të cilat nutricionistja flet për vlerat ushqyese të përbërësve për secilin nga ta.
Në sezonin e parë gjithsej do të realizohen 24 emisione, të cilat mund t’i shihni çdo të diel paradite si dhe ritransmetim të shtunave pasdite.
Ky emision mundesohet nga Klinika Amerikane – Dr. Behar Kusari. /Telegrafi/
