Gjiganti i veshmbathjeve sportive Nike ka pezulluar kontratën me tenisten ruse Maria Sharapova, e cila dje ka konfirmuar se ka dështuar në testet anti-doping në Australian Open.
Pesë herë fituesja e Grand Slamit ka thënë se që nga viti 2006 ka marr substancën meldonium, me këshillë të mjekut të saj familjar. Ajo doli pozitiv në prag të Australian Open, raporton BBC.
Nike ka thënë se është i “trishtuar dhe befasuar” me dështimin e saj për testin anti-doping, ndërsa pezullimi do të jetë në fuqi përderisa janë duke u kryer hetimet. Ajo kishte arritur marrëveshje me këtë kompani që kur ishte 11 vjeç, transmeton Koha.net.
“Kemi vendosur që të pezullojmë marrëdhënien tonë me Marian përderisa vazhdojnë hetimet. Ne do të vazhdojmë të monitorojmë situatën”, thuhet në komunikatën e Nikes.
Në 2010 rusja kishte nënshkruar kontratë tetë vjeçare me Niken në vlerë prej 70 milionë dollarë.