Hamidou Diallo është fituesi i garës ‘Slam Dunk Contest 2019’ në NBA All Star.
Basketbollisti i talentuar amerikan ka shkëlqyer në këtë garë dhe në fund ka triumfuar para konkurrentëve të tjerë Dennis Smith JR, Miles Bridges e John Collins.
Në garën e fundit Diallo shkoi në konkurrencë me Dennis Smith JR, por ishte basketbollisti i Oklahoma City Thunder në fund që triumfoi.
Ngulitja më spektakolare e 20-vjeçarit u vlerësua ajo kur kaloi legjendën Shaquille O’Neal për tu ndalur në kosh.
Kjo ngulitje ngriti të gjithë të pranishmit në këmbë të cilët e duartrokitën basketbollistin e talentuar.
Për Diallon ishte hera e parë që po merr pjesë në këtë garë dhe natyrisht triumfi i parë.
Diallo është shprehur shumë i lumtur me triumfin në Slam Dunk Contest, ndërsa ka edhe një dedikim për këtë trofe.
“Atmosfera ishte e mrekullueshme dhe sapo dola ia dhurova publikut atë që e dëshironin”, tha Diallo.
“Ky trofe është për personin më të dashur për mua, për nënën time. Jam shumë i lumtur që kam triumfuar”, u shpreh Diallo pas triumfit. /Telegrafi/
