Ish-oficeri amerikan, Derek Chauvin, u dënua me 22 vjet e pesë muaj burg për vrasjen e afro-amerikanit, George Floyd.
Pas këtij vendimi ka pasur reagime të ndryshme, përfshirë edhe nga vëllai i Floyd, Philonise, i cili bëri disa komente jashtë gjykatës.
Philonise Floyd ka falënderuar aktivistët në të gjithë botën – nga Japonia në Gjermani – për tubimin dhe protestat kundër racizmit pas vdekjes së vëllait të tij, në maj të vitit 2020.
“Ngjyra juaj e lëkurës nuk duhet ta përcaktojë se kush jeni”, ka deklaruar Philonise.
“Tani kam shumë emocione që kalojnë nëpër kokën time”, thotë ai.
“Jetën, ju nuk mund ta riktheni”, deklaroi mes tjerash vëllai i George Floyd.
George Floyd, 48-vjeçar, vdiq pasi Chauvin ia vendosi gjurin në qafë për më shumë se nëntë minuta, jashtë një dyqani, ku ai kishte blerë cigare.
Vrasja e tij shkaktoi protesta globale kundër racizmit dhe brutalitetit të policisë.
Chauvin, 45-vjeçar, u dënua për vrasje të shkallës së dytë dhe akuza të tjera, muajin e kaluar. Gjatë gjykimit të tij, avokati i tij e përshkroi vrasjen “si një gabim të bërë me mirëbesim”.
Prokurorët kishin kërkuar një dënim me 30 vjet burg.
Chauvin dhe tre ish-oficerë të tjerë akuzohen veçmas për shkeljen e të drejtave civile të George Floyd. /Telegrafi/