Policia në Munih ka nisur një hetim pasi më shumë se 1000 etiketa janë ngjitur në varre dhe kryqe druri në tre varreza të këtij qyteti gjerman. Nuk ka asnjë tregues se kush dhe përse i ka vendosur ato.
Etiketat, me përmasa 5×3,5 centimetra, përmbajnë një kod QR që, pas skanimit, shfaq emrin e personit të varrosur dhe vendndodhjen e tij në varrezë, por asgjë më shumë.
“Ende nuk kemi gjetur asnjë model pas kësaj. Etiketat janë vendosur si në varre të vjetra disa dekadash, ashtu edhe në ato shumë të reja që për momentin kanë vetëm një kryq druri”, tha zëdhënësi i policisë Christian Drexler për Associated Press.
“Dëshmitarët që kanë parë dikë duke ngjitur etiketa në varre, janë të lutur të kontaktojnë administratën e varrezës përkatëse”, shtoi Drexler.
Etiketat janë shfaqur ditët e fundit në varrezat Waldfriedhof, Sendlinger Friedhof dhe Friedhof Solln.
Policia jo vetëm që po heton se kush qëndron pas këtyre etiketave, por gjithashtu po vlerëson dëmin material, pasi disa varre janë dëmtuar pjesërisht dhe janë ndryshuar pas heqjes së etiketave. /Telegrafi/