Ballkani dhe Drita vazhduan tutje garat në Ligën e Konferencës, duke kaluar në raundin e tretë, gjë që mbush edhe arkat e klubit.
Kampioni i Kosovës, Ballkani, gjendet në këtë nivel për të tretin vit radhazi, ndërsa Drita për herë të parë ka arritur deri në këtë nivel, pasi në të kaluarën është eliminuar në raundin e dytë.
Fatkeqësisht, Llapi dhe Malisheva u larguan nga garat evropiane. Llapjanët që kishin dy mundësi, fillimisht në Ligën e Evropës në përballje me ëilsa Krakoë ku humbi dy ndeshjet, pastaj në Ligën e Konferencës, ndaj Brondbyt, ku humbën ndeshjen e parë thellë me rezultat 6-0, ndërsa në “Zahir Pajaziti” barazuan me rezultat 2-2.
Por sa kanë fituar deri më tani katër klubet tona që ishin pjesën e garave evropiane?
Sipas football-coefficient, një ueb faqe e specializuar për koeficientët e pikëve dhe fitimet e klubeve në garat evropiane, paraqet saktësisht si dhe nga sa para marrin klubet pas një raundi në garat evropiane.
Ballkani si kampion që do t’i vazhdojë garat në Ligën e Konferencës, ndaj Larne të Irlandës së Veriut në raundin e tretë, deri më tani ka të sigurta 1.335.000 euro.
Për organizimin e tre ndeshjeve në tre raunde merr nga 175 mijë euro, një total prej 525 mijë euro. Nëse eliminohen në raundin e tretë, si i eliminuar kontos së klubit i shtohen edhe 550 mijë euro të tjera. Po ashtu kampioni i Kosovës merr edhe 260 mijë euro të tjera si bonus social për eliminimin.
Ballkani deri më tani ka 2.000 pikë, ndërsa në dy vitet e mëparshme kishte tubuar nga 3000 pikë.
Drita që do të luajë në raundin e tretë të Ligës së Konferencës, ndaj Auda FC të Letonisë, pasi arriti ta eliminonte Breidablikun, duke e mposhtur në dy ndeshje.
Drita deri më tani ka të sigurta 900 mijë euro, por do të tentojë të shkojë edhe më lartë.
Për ndeshjen e parë dhe tani të dytën, Drita ka siguruar 350 mijë euro, ndërsa në rast eliminimi në këtë fazë, do të merrte si bonus 550 mijë euro.
Drita deri tani ka marr 2000 pikë me dy fitore në garat evropiane, rekord që barazohet me sezonin 2020/21, kur kishte kaq pikë.
Llapi është ndalur te 700 mijë euro fitime nga garat evropiane, pasi u eliminua pas dy raundeve.
Për ndeshjet me Wislan dhe Brondbyn klubi përfitoi 350 mijë euro, ndërsa 350 mijë euro të tjera do t’i shtohen për eliminimin nga garat evropiane.
Llapi siguroi 1.500 pikë nga këto gara evropiane, pas tri humbjeve dhe një barazimi.
Për fund vjen Malisheva, që mori pjesë për herë të parë në garat evropiane, por u eliminuan në raundin e parë nga Buducnosti i Malit të Zi.
Malisheva mori nga garat evropiane 325 mijë euro, pra 175 mijë për ndeshjen e zhvilluar dhe 150 mijë nga eliminimi.
Ballkani dhe Drita mund ta rrisin shifrën e të ardhurave me kalimin tutje, pasi realisht para vetës kanë kundërshtarë të përballueshëm, për të kaluar pastaj play-offin, apo një hap larg fazës së grupeve, që siguron mbi 3 milionë euro të ardhura. /Telegrafi/