Edvin dhe Armisa Kuc janë shembulli i përkryer i talentit futbollistik dhe dashurisë për lojën që ecën brenda një familjeje. Vëlla e motër, të dy kanë rrugëtuar në një udhëtim fantastik dhe që kanë pasionin e madh për futbollin.
Lindur dhe rritur në një familje që i ka vlerësuar dhe mbështetur aspiratat e tyre sportive, Edvin dhe Armisa kanë ndjekur ëndrrat e tyre duke u ngjitur nëpër radhët e futbollit për të arritur vende të larta si lojtarë të përfaqësueses së Malit të Zi.
Armisa (31) është më e madhe në moshë se Edvin (30) dhe që të dy kanë arritur të krijojnë një emër shumë të respektuar në futbollin e Malit të Zi si në konkurrencën e meshkujve ashtu edhe të femrave.
Ndërkohë që Edvin shfaqet me forcë dhe teknikë në mesfushë, duke u bërë një element stabilizues për skuadrën e tij Ballkanin, Armisa është një sulmuese e rrezikshme që i kanë frikën të gjitha mbrojtjet kundërshtare dhe portieret e tyre.
Edvin dhe Armisa janë dëshmi e gjallë se futbolli nuk njeh kufij kur bëhet fjalë për përkushtim dhe dëshirë për të arritur majat.
Mesfushori i Ballkanit e ka nisur karrierën te skuadra e vendlindjes Ibar Rozhajë, për të vazhduar te Berane, Deçiç, Usti nad Labern, Mladost, sërish te Deçiç e pastaj te Rudar para se t’i bashkohet suharekasve në vitin 2019 ku tani është kapiten dhe njëri nga mesfushorët më të mirë në Kosovë.
Në anën tjetër Armisa karrierën e ka nisur në skuadrën Ekonomist, para se të vazhdoj në disa vende të ndryshme të Evropës si SFK 2000, Kvarnsvedens, Real Zaragoza, Malaga, FC Minsk, Zenit st Petersburg dhe tani është pjesë e skuadrës turke Ankara BB.
Në një intervistë për Telegrafin, Edvin dhe Armisa janë rrëfyer për karrierën e tyre, duke treguar nga fillimi e deri më tani ku të dy janë pjesë e Përfaqësueses së Malit të Zi dhe janë ndër futbollistët kryesorë të kësaj përfaqësuese.
Edvin dhe Armisa, si është të jeni vëlla e motër futbollistë/e?
Edvin Kuc: Për mua Armisa është heroi i qytetit tonë, pasi duke marrë parasysh që në Rozhajë nuk ka asnjë klub futbolli për femra, ajo bëri një karrierë të madhe me vullnetin, talentin dhe punën e saj.
Armisa Kuc: Është një nder i madh të kem një vëlla që është futbollist i shkëlqyer dhe një njeri edhe më i mirë.
Armisa është më e madhe, por cili keni filluar më parë të merreni me futboll?
Edvin Kuc: Unë kam qenë i pari që kam filluar, siç thashë nuk ka klub futbolli për femra në Rozhajë, ajo ka filluar të luajë shumë më vonë, nëse do të kishte pasur një punë reale që në fillim, mendoj se karriera e saj do të ishte shumë më e madhe.
Armisa Kuc: Edvini filloi i pari, unë erdha të shikoja stërvitjet dhe m’u pëlqyen, kështu që u bashkova me ta.
Duke e ditur që jeni futbollistë/e të shkëlqyer që të dy, a ju ka rastisë të luani së bashku ndonjëherë ose si kundërshtarë, flasim për moshën kur keni qenë më të ri dhe në ndonjë ndeshje miqësore ose mes miqsh?
Edvin Kuc: Kur ishim më të vegjël luanim gjithmonë kundër njëra-tjetrës, por ajo ishte e vetmja vajzë mes nesh, por nuk kishte shumë ndryshim në cilësinë e saj. Dashuria e saj për futbollin i kapërceu të gjitha paragjykimet. Edhe sot jam krenar për të.
Armisa Kuc: Ne kemi luajtur shumë herë së bashku në ekip dhe kundër njëri-tjetrit. Kur kemi pushime, zakonisht stërvitemi së bashku dhe ndonjëherë luajmë.
Që të dy luani për Përfaqësuesen e Malit të Zi, çfarë do të thotë kjo për ju?
Edvin Kuc: Ka shumë vite që luan për kombëtaren dhe është lojtarja më e mirë, golashënuesja më i mirë dhe lojtarja kryesore e ekipit. Ne të dy arritëm ëndrrat tona. Dhe së bashku duam ta çojmë kombëtaren tonë në një kompeticion të madh.
Armisa Kuc: Kënaqësi e madhe, të përfaqësosh vendin ku ke lindur është një sukses i madh për ne.
Cili keni bërë karrierë më të madhe deri më tani, ti Edvin apo ti Armisa?
Edvin Kuc: Ne nuk garojmë kurrë në atë kuptim, për ne është e rëndësishme që të jemi të lumtur dhe të ndihmojmë klubin dhe kombëtaren për të arritur rezultate sa më të mira. Të dy bëmë një sukses të madh, duke marrë parasysh kushtet në të cilat punuam dhe pa asnjë ndihmë, mendoj se duhet të jemi më se të kënaqur me performancën tonë.
Armisa Kuc: Ne kemi karriera njëlloj të mira dhe nuk duam të ndalemi këtu. Punuam shumë dhe në fund ia dolëm mbanë.
Cilat janë këshillat që ia keni dhënë njëri tjetrit sa i përket karrierës suaj?
Edvin Kuc: Ne të dy gjithmonë mbështesim njëri-tjetrin, si në momente të mira ashtu edhe në të këqija. Dashuria jonë për futbollin na ka shtyrë gjithmonë përpara. Ka pasur shumë momente të vështira, por kemi kapërcyer gjithçka bashkë.
Armisa Kuc: Edhe pse Edvini është më i ri se unë, ai më jep më shumë këshilla se sa i jap unë atij. Ai është më i pjekur se unë dhe unë jam gjithmonë e lumtur t’i dëgjoj këshillat e tij.
Por në cilin moment ndaheni dhe jeni rival me njëri tjetrin sa i përket futbollit, duke shikuar ndonjë ndeshje ?
Edvin Kuc: Jemi mjaft të ngjashëm, dhe nuk kemi ndonjë rivalitet negativ. Ne gjithmonë ndihmojmë njëri-tjetrin dhe përpiqemi të jemi më të mirë çdo ditë. Armisa është një luftëtare e vërtetë, më besoni nuk kam parë kurrë një dëshirë të tillë tek askush. Pozitiviteti i saj është gjithmonë një mbështetje dhe ndihmë për mua.
Armisa Kuc: U ndamë kur ishim më të rinj, por unë gjithmonë i ndjek ndeshjet e tij dhe jam krenare për të.
Cili keni bërë më shumë para prej futbollit haha?
Edvin Kuc: Sinqerisht, ne flasim rrallë për financat, është e rëndësishme për ne që të jemi të lumtur dhe të gjithë rreth nesh të jenë krenarë. Gjërat materiale nuk e bëjnë lumturinë
Armisa Kuc: Nuk e di, ne nuk flasim për këtë, por ai dhe unë jemi të kënaqur me atë që kemi arritur dhe kemi krijuar deri më tani.
Armisa tanimë ka çmimin si futbollistja e vitit në Malin e Zi, cka do të thotë kjo për ty? Po ti Edvin, a synon që ta kesh të njëjtin çmim që mos të jetë motra në epërsi ndaj teje haha?
Edvin Kuc: Armisa në tre vitet e fundit është shpallur dy herë futbollistja më e mirë e Malit të Zi, gëzohem pa masë kur e shoh në fron, e di se çfarë ka kaluar dhe ai çmim është vetëm kurora e karrierës së saj të madhe. Shpresoj që një ditë të ketë sa më shumë. Dhe se një ditë do të shpallemi së bashku dhe do të jemi së bashku në fron.
Armisa Kuc: Unë jam lojtarja më e mirë femër në Mal të Zi për herën e dytë, me siguri është një sukses i madh për mua. Jam e sigurt që edhe Edvini do ta arrijë atë trofe, në mënyrë që një ditë të ngjitemi së bashku në podium. /Telegrafi/
