Ylli brazilian i Paris Saint-Germain, Neymar ka thënë se shpresat e kualifikimit tutje në Ligën e Kampionëve nuk kanë përfunduar megjithë humbjen 3-1 në Real Madrid.
Gjiganti francez u mposht me rezultat 3-1 në takimin e parë të të tetës së finales në Ligën e Kampionëve nga Real Madridi në Santiago Bernabeu.
Goli i vetëm për parisienët u shënua nga Adrien Rabiot, ndërsa për Mbretërit shënuan Cristiano Ronaldo dy gola dhe një tjetër Marcelo.
Ish-sulmuesi i Barcelonës bëri një paraqitje të dobët në humbjen e skuadrës së tij, por ai gjithashtu këmbënguli që ai ishte i lumtur në klub pavarësisht lidhjeve me një veprim të ardhshëm në Madrid.
Neymar gjithashtu ka deklaruar se edhe pse kanë humbur në ndeshjen e parë ende asgjë nuk ka përfunduar pasi është edhe ndeshja e kthimit.
“Nuk ka përfunduar ende asgjë pasi ndeshja e kthimit ende nuk është zhvilluar”, ka thënë fillimisht Neymar për gazetarët.
“E ardhmja ime? Unë kam një kontratë në PSG, jam i lumtur këtu dhe jam plotësisht i fokusuar, nuk ka diskutim”, përfundoi ylli brazilian.
Ndryshe, ndeshja e kthimit në Parc des Princes zhvillohet pas tri javëve apo më saktë me datë 6 mars. /Telegrafi/