Trafikun e urrejmë të gjithë, sidomos kur shkojmë apo kthehemi nga puna. Diçka që e ka shtyrë një 28-vjeçar nga Kina që ta marrë situatën në dorë.
Tekstualisht kështu, pasi me një kovë bojë dhe një furçë në dorë, kinezi i identifikuar vetëm me mbiemrin Cai doli në rrugë dhe pikturoi shenjat e trafikut, siç i bënin punë atij.
Kamerat e trafikut e filmuan atë duke pikturuar shigjeta të rrugë, në një mënyrë që lëvizja t’i përshtatej drejtimit të tij të përditshëm për në punë.
Pikërisht këtë i tha 28-vjeçari policëve, kur e ndaluan dhe i bënë me dije se ajo që ai bëri nuk lejohet.
Cai tregoi se prej muajsh shikonte korsinë e tij të mbushur plot, ndërsa ajo që kthehej majtas ishte gjithnjë bosh. Kështu që kishte menduar ta ndryshonte.
Policët nuk e kanë vlerësuar aspak planin e tij dhe e gjobitën me 150 dollarë për dëmtimin e shenjave të lëvizjes në rrugë, transmeton tch.
Megjithatë, mediet kineze raportojnë se në rajon e trajtuan situatën me mjaft humor dhe i thanë 28-vjeçarit se, sikur të ishte kaq e lehtë të ndryshoheshin shenjat rrugore, të gjithë do të kishin parkingun e tyre personal para derës së shtëpisë.
