Shoqata e personave të diagnostifikuar me diabet, ”Balance”, thotë se në muajt e fundit, pothuajse në të gjitha barnatoret mungon insulina, transmeton Telegrafi Maqedoni.
Kjo shoqatë ka kërkuar takim në ministrinë resore, por nuk i ka pritur askush, ndërkaq kur mungon një lloj insuline, të sëmurët me diabet e zëvendësojnë me ndonjë lloj tjetër.
Sipas Cvete Serafimovski nga ”Balance”, kjo është në dëm të pacientëve, pasi që rrezikohet jeta. Serafimovski thotë se organizmit i duhet kohë që të përshtatet me ilaçin e ri, nëse e pranon, ndërkaq duhet që insulina të ndrohet në kushte klinike kur pacienti është në mbikëqyrje të vazhdueshme mjekësore.
Kjo shoqatë thotë se janë publikuar specifikat e tenderit të ri për blerjen e insulinës, me të cilin zvogëlohen sasitë e insulinës analoge bashkëkohore, por rriten ato humane. Sipas tyre, në tenderin e fundit, 90% e insulikës ishte bashkëkohore, që më pastaj të bie në 75%, kurse me speficikat e fundit, insulina bashkëkohore është 55% nga sasia e përgjithshme. Kjo ndodh për shkak të ndryshimit të detyruar të llojit të insulinës nga pacientët./Telegrafi/