Pas nënshkrimit të marrëveshjes për bashkëqeverisje me AAK-në, Lidhja Demokratike e Kosovës sot do të nënshkruaj marrëveshjen edhe me Nisma Socialdemokrate.
Nënshkrimi i kësaj marrëveshje pritet të bëhet rreth orës 13:00. Kështu ka bërë të ditur për Telegrafin, anëtari i kryesisë së Nismës, Endrit Shala.
“Ne i kemi finalizuar gati në detaje dhe presim sot ta nënshkruajmë rreth orës 13:00”, ka thënë Shala.
I pyetur se me cilat ministri do të udhëheq Nisma, Shala tha se kjo do të bëhet publike pas nënshkrimit të marrëveshjes.
I propozuari për kryeministër nga LDK-ja, Avdullah Hoti ka deklaruar se përveç AAK-së kanë arritur marrëveshje bashkëqeverisëse edhe me një pjesë të komuniteteve, përfshirë Listën Serbe. Hoti ka theksuar se brenda ditës së sotme do të përmbyllin gjitha marrëveshjet me Nismën, AKR-në, dhe një pjesë të komuniteteve.
Hoti pas takimeve të njëpasnjëshme në hapësirat e Kuvendit të Kosovës tha se më parë që i përmbyllin këto marrëveshje do të procedojnë me seancën e jashtëzakonshme për tu votuar kjo qeveri. /Telegrafi/