Në një komunikatë për media nga zyra e informimit e Universitetit të Mitrovicës, thuhet që në këtë universitet kanë aplikuar 2027 kandidatë për t’u bërë pjesë e studimeve në këtë Universitet.
Sipas komunikatës, në Universitet do të pranohen 1460 studentë. Provimet pranuese do të mbahen të mërkurën (20 korrik 2016), prej orës 9:00 dhe prej orës 12:00, në të gjitha fakultet.
“Interesimi më i madh, ashtu sikur në vitet tjera, ka qenë për Fakultetin e Edukimit, ku për 173 vende kanë aplikuar 984 kandidatë. Në Fakultetin Juridik, për 161 vende kanë aplikuar 376 kandidatë, ndërsa në Fakultetin Ekonomik për 230 vende kanë aplikuar 366 kandidatë.
Interesimi ka qenë i mirë edhe për programet teknike. Në Fakultetin e Gjeoshkencave. për 207 vende kanë aplikuar 73 kandidatë, në Fakultetin e Teknologjisë Ushqimore për 208 vende kanë aplikuar 112 kandidatë, ndërsa në Fakultetin e Inxhinierisë Mekanike dhe Kompjuterike për 481 vende kanë aplikuar 152 kandidatë.
Provimet pranuese do të mbahen të mërkurën (20 korrik 2016) në të gjitha fakultetet. Prej orës 09:00 provimet mbahen për kandidatët që kanë aplikuar në Fakultetin e Gjeoshkencave, Fakultetin e Teknologjisë Ushqimore dhe Fakultetin e Inxhinierisë Mekanike dhe Kompjuterike. Në këto fakultete provimit do t’i nënshtrohen vetëm ata kandidatë që nuk e kanë provimin e maturës.
Prej orës 09:00 provimi pranues do të mbahet për kandidatët e Fakultetit Juridik, prej orës 12:00 për kandidatët e Fakultetit Ekonomik dhe prej orës 15:00 dhe 17:00 për kandidatët e Fakultetit të Edukimit”, thuhet në komunikatë. /Telegrafi/