Një aktivitet ndryshe nga ato që qytetarët në Tiranë janë mësuar të shohin zakonisht. Të dielën në kryeqytet, mijëra banorë u mblodhën për të shijuar garën e kërcimit me kuaj, një kompeticion ndërkombëtar që vjen në Shqipëri për herë të parë.
Aktiviteti i sotëm, i zhvilluar në ambientet pranë stadiumit “Selman Stërmasi”, shënoi hapjen e garave ndërkombëtare, ndërsa Bashkia e Tiranës, si pjesë e organizatorëve, ka menduar që ngjarje të tilla të kthehen në traditë.
“Ne do ta përsërisim këtë aktivitet. Gjatë vitit do të ketë 3 ose 4 kampionate të nivelit ndërkombëtar. Këtë zonë para stadiumit “Selman Stërmasi” duam ta kthejmë në një pikë të rëndësishme për sporte të ndryshme. Edhe për njerëzit e thjesht, duke pirë diçka, duke ndenjur, është interesante sepse është një e diel ndryshe”, shprehet Blendi Gonxhe, kreu i drejtorisë së parqeve, Bashkia Tiranë.
16 kalorës nga Shqipëria dhe vende të ndryshme të botës garuan me njëri-tjetrin.
Pjesë të garës u bënë anëtarë të Federatës Shqiptare të Hipizmit dhe sipërmarrës privatë, të apasionuar pas këtij sporti.
Aktiviteti u cilësua nga organizatorët si test i rëndësishëm për të provuar kapacitetin e këtij terreni dhe përkrahjen e qytetarëve për zhvillimin e garave të tilla.
Kërcimi me kuaj do të kthehet sërish në Tiranë, me një kalendar zyrtar, të cilit do t’i bashkëngjiten gjatë vitit një sërë aktivitetesh të ngjashme.