Spanja është një prej shteteve evropiane që nuk e ka njohur Pavarësinë e Kosovës, mirëpo gjatë ditës së mërkurë është njoftuar dy herë me shtetin tonë.
Kjo për faktin se xhudistet Distria Krasniqi dhe Nora Gjakova fituan medaljet e arta në Lojërat Mesdhetare ‘Tarragona 2018’.
Falë suksesit të sportisteve tona, në Tarragona të Katalunisë është intonuar himni i Kosovës dhe është ngritur flamuri ynë shtetëror.
Sot në Spanjë është intonuar dy herë himni i Kosovës, pas fitoreve që kanë shënuar dy xhudistet e Kosovës.
Në faqen e Komiteti Olimpik të Kosovës në Facebook është publikuar një video nga momenti i intonimit të himnit të Kosovës dhe ngritja e flamurit.
“Emocione pa fund. Himni i Kosovës dhe flamuri lart në Tarragona të Spanjës”, shkruan në përshkrimin e videos.
“Flamuri i Kosovës duke valuar më së larti në Tarragona të Spanjës. Kosova fitoi dy medalje të arta në Lojërat Mesdhetare ‘Tarragona 2018’ nga xhudistet Nora Gjakova dhe Distria Krasniqi”, shkruan në një tjetër postim të KOK-ut. /Telegrafi/
