Përgjatë 24 orëve të fundit në Shqipëri janë kryer 864 testime të dyshuara me COVID-19, ndërsa 152 prej tyre kanë rezultuar pozitivë. Në komunikimin e përditshëm për mediat, Task-Forca u shpreh se, dy pacientë kanë humbur jetën duke e çuar numrin e viktimave në 240, që nga fillimi i pandemisë.
Sipas autoriteteve shëndetësore, aktualisht në spitalin Infektiv dhe “Shefqet Ndroqi” po marrin shërbim 137 pacientë të konfirmuar pozitivë me COVID-19, ku 24 ndodhen në terapi intensive dhe 7 janë të intubuar.
Gjatë orëve të fundit listës së të shëruarve i janë shtuar 110 qytetarë, të cilët kanë mposhtur me sukses virusin agresiv të Covid-19. Qarku më i prekur nga infeksioni vijon të mbetet Tirana, e cila deri tani numëron 119 viktima, e ndjekur nga Shkodra dhe Durrësi.
Shpërndarja gjeografike e rasteve aktive sipas qarqeve
Tiranë 1947
Durrës 489
Shkodër 302
Fier 177
Lezhë 157
Korçë 165
Vlorë 146
Kukës 123
Elbasan 118
Berat 70
Gjirokastër 45
Dibër 44.
Ministria e Shëndetësisë kërkon nga qytetarët të respektojnë rregullat anti-covid, të ruajnë distancën si dhe të shmangin vendet ku ka shumë njerëz. Zonja Ogerta Manastirliu, pak ditë më parë nga banka e gjakut në QSUT deklaroi se janë finalizuar protokollet për të kryer terapinë e plazmës.
Ajo ftoi qytetarët që kanë kaluar virusin të dhurojnë gjak, ndërsa u shpreh se kjo terapi do t’iu vijë në ndihmë të prekurve me Covid-19.
“Në bashkëpunim me Universitetin e Pavias e kemi nisur dhe po e finalizojmë këtë proces dhe jemi gati për të ndërtuar bankën e plazmës. Janë marrë të gjitha masat për të garantuar cilësi dhe siguri për aplikimin edhe të kësaj terapie për ata pacientë që kanë nevojë në dy spitalet COVID”, tha Manastirliu.