Stuhia e mbrëmshme në Shkodër, që ndërpreu ndeshjen Shqipëri-Maqedoni në minutën e 75-të, ka pasur edhe pasoja të tjera.
Ndër të cilat, tragjike. Një tifoz i kombëtares kuqezi, i ardhur nga Kosova, ka humbur jetën në kryeqendrën e veriut. Fjala është për 65-vjeçarin, Kadri Shkrela, i cili ka humbur jetën, pasi ra në kontakt me rrymën elektrike.
Ngjarja mësohet se ka ndodhur në orët e para të mëngjesit të sotëm, në bulevardin Bishanaku, ose e njohur si “Rruga e Gjanë”, afër stadiumit “Loro Boriçi”.
Mësohet se tifozi nga Kosova ishte mbështetur në shtyllën e ndriçimit, por për shkak të mbushjes së saj me ujë, 65-vjeçari ka rënë në kontakt me rrymën elektrike, i cili i ka shkaktuar vdekjen e menjëhershme, shkruan Telesport.al.
Një lajm vërtet i hidhur ky për kombëtaren, veçanërisht për tifozët kuqezinj, që e mbushën mbrëmë stadiumin “Loro Boriçi”, por dolën prej tij të qullur nga shiu dhe jo fort të kënaqur nga loja dhe rezultati i 75 minutave të ndeshjes Shqipëri-Maqedoni.