Prokurorja kërkoi dënimin e tre personave që grabitën me forcë para, stoli ari dhe një iphone 6 nga një grua në Gjakovë.
Grabitja kishte ndodhur më 2 tetor të vitit të kaluar, ndërsa sipas aktakuzës, Vlora Zekës, te hyrja e banesës së saj, nga çanta e krahut i ishin marrë me forcë 12 mijë euro, stoli ari në vlerën e 1100 eurove dhe një iphone 6.
“Nuk është kontestuese se ata janë takuar atë natë në kafe te hoxhët, kanë pirë kafe dhe kanë realizuar planin e tyre, andaj i propozoj gjykatës që të akuzuarit Mentor Dedaj, Manol Dedaj dhe Nikollë Prenkaj të shpallen fajtorë për veprën penale të grabitjes”, tha prokurorja Shpresa Bakija.
Por, Agim Muhaxhiri, avokati i Mentor Dedës, tha se nuk është vërtetuar që i mbrojturi i tij ka kryer grabitjen.
Kundër aktakuzës foli edhe Flamur Kelmendi, avokati i Manol Dedës. Ndërsa, mangësi në aktakuzë gjeti edhe avokati Driton Dobruna që në këtë proces mbron Nikollë Prenkajn.
Gjykata Themelore në Gjakovë nesër do të shpallë vendimin për këtë gjykim. /kallxo.com/
