Nuk ka rikthim të gripit të derrit në Kosovë. Rastet nga të cilat ka vdekur një person një ditë më parë dhe një tjetër gjatë ditës së mërkurë ishin të prekur nga gripi sezonal, raporton KTV.
Madje, mjekët parashohin se një virus i tillë nuk mund të rikthehet as për 15 vjetët e ardhshëm.
Drejtori i Klinikës Infektive, Hamdi Ramadani, thotë se nuk ka vend për panik, ndërsa pranon se rastet me grip sezonal janë shtuar dhe se ata që kanë ndonjë problem më të vjetër shëndetësor po e pësojnë. Ramadani nuk e ka përjashtuar mundësinë e paraqitjes së këtij virusi, edhe pse tha se shanset janë minimale.
Ndonëse janë duke i trajtuar të gjitha rastet, as kjo klinikë nuk kursehet nga mungesa e barnave.
Ndryshe kjo klinikë në raste të veçanta ka të drejtë të shfrytëzimit të mjeteve kesh nga 100 deri në 200 euro për të mbuluar nevojat e pacientëve.