Vaksinimi i qytetarëve po vazhdon edhe sot në tërë Kosovën, ndërkohë që sot janë vaksinuar rreth 1mijë e 300 persona.
Personeli i institucioneve shëndetësore, të cilët e kanë marrë dozën e parë të vaksinës kundër COVID-19, më datë 5 maj 2021, janë ftuar me termine për marrjen e dozës së dytë të vaksinës kundër COVID-19.
Koordinatori i qendrës së vaksinimit në sallën “1 Tetori”, në Prishtinë, Niman Bardhi tha se deri sot në Kosovë janë aplikuar 80 mijë vaksina.
“Është duke vazhduar procesi i vaksinimit… Po ashtu edhe në nivel vendi me dozën e parë dhe me dozën e dytë të njëjtën kohë, aktualisht deri në këto qaste që ne flasim vetëm në sallën ‘1 Tetori’ kemi 460 vaksina të aplikuara, ndërsa nëse i referohemi nivel vendit, kemi rreth 1300 vaksina të aplikuara…nëse flasim nga dita e parë të fillimit të vaksinimit, dozë të parë dhe dozë të dytë deri në këto çaste ne tani jemi tek shifra e 80 mijë vaksinave të aplikuara”, tha ai.
Qytetarët për t’u vaksinuar duhet të aplikojnë në e-Kosova, dhe të presin thirrjen nga Ministria e Shëndetësisë për vaksinim.