Banorët e fshatit Idrizovë të Komunës Gazi Babë mundohen t’ia lehtësojnë punën ministrisë së Arsimit për ndërtimin e një shkolle fillore, ka njoftuar Alsat-M. Ata kanë siguruar një parcelë private për realizimin e kësaj nevojë të kamotshme. Nxënësit e këtij fshati nga klasa e gjashtë e deri në atë të nëntë janë të detyruar të udhëtojnë në një largësi deri në 20 kilometra për të ndjekur mësimin në gjuhën amtare shqipe nëpër shkollat tjera të Shkupit, transmeton Telegrafi Maqedoni.
E gjithë kjo ndodh sepse pas përfundimit të klasës së pestë atyre nuk u lejohet të mësojnë në gjuhën amtare në shkollën fillore ‘Petar Petroviç Njegosh”, që e kanë në afërsi.
Për këtë problem banorët e kanë akuzuar kryetarin e komunës së Gazi Babës, Toni Trajkovski, për të cilin thonë se ka ushtruar presion ndaj tyre për të mos kërkuar hapjen e paraleleve shqipe nga klasa e gjashtë e deri atë të nëntë në shkollën “Petar Petroviç Njegosh”.
Problemi me paralelet shqipe të Idrizovës assesi të merr fund edhe pse zgjidhje për këtë problem ishte premtuar që në vitin 2008, kur ministër i Arsimit ishte Pero Stojanovski./Telegrafi/