Lajmi për një vaksinë që parandaloi COVID-19 te 90 për qind e njerëzve në provat klinike, çoi në një rritje të thashethemeve anti-vaksinë në mediet sociale.
Më poshtë janë shqyrtuar disa prej pretendimeve të rreme për sa i përket kësaj çështjeje, shkruan BBC, përcjell Telegrafi.
Bill Gates dhe pretendimet për injektimin e mikroçipave
Themeluesi i Microsoftit, Bill Gates ka qenë subjekt i shumë thashethemeve të rreme gjatë pandemisë COVID-19.
Një nga pretendimet më të shpërndara këtë javë që qarkulloi edhe që nga fillimi i këtij viti është se kinse pandemia aktuale është si një mbulesë e një plani për të implantuar mikroçipa të vegjël dhe të gjurmueshëm tek njerëzit, dhe që Gates qëndron mbrapa këtij plani.
Deri më tani nuk ka asnjë provë që mbështet këto pretendime derisa Fondacioni Bill dhe Melinda Gates i kanë thënë BBC-së, se ato janë plotësisht false.
Pretendimi që vaksina mund të ndryshojë ADN-në e njeriut
Një korrespodente e Shtëpisë së Bardhë për një faqe pro-Trump, Newsmax, iu tha 264 mijë ndjekësve në Twitter të “kenë kujdes” nga vaksina e Pfizer dhe BioNTech.
Emerald Robinson pohoi në Twitter se “vaksina mund të shkaktojë ndryshime në ADN-në tuaj”.
Frika se një vaksinë do të mund të ndryshonte ADN-në e njeriut është një tjetër pretendim që kemi parë të shpërndahet rregullisht në Facebook.
Disa shkencëtarë të pavarur deklaruan se një gjë e tillë nuk do të ndodhte.
Ndryshe vaksina përmban një fragment të materialit gjenetik të virusit ose ARN-në.
“Injeksioni i ARN-së në një person nuk i bën asgjë ADN-së së një qelize njerëzore”, u shpreh Jeffrey Almond i Universitetit të Oksfordit.
Ndërkohë, zëdhënësi i Pfizer, Andrew Widger, tha se vaksina e tyre nuk ndryshon sekuencën e ADN-së së trupit të njeriut. Ajo ndihmon trupin në udhëzimet për të ndërtuar imunitetin.
Kjo nuk është edhe hera e parë që jemi përballur në pretendime të tilla që vaksina e coronavirusit do të ndryshonte ADN-në tonë.
Pjesa e keqkuptimit duket se buron nga lloji i vaksinës që po zhvillohet. Vaksina Pfizer dhe e BioNTech përdor teknologjinë ARN ose mARN.
Postimi i Robinson përfshinte pohimin se teknologjia e vaksinave mRNA nuk ishte testuar ose aprovuar më parë.
Është e vërtetë që asnjë vaksinë e mARN-së nuk është aprovuar më parë, por studime të shumta të vaksinave të ARN-së tek njerëzit kanë ndodhur gjatë viteve të fundit.
Almond thotë se vaksina e Pfizer dhe BioNTech është e para që tregon efikasitetin që do të nevojitej për t’u konsideruar për licencim.
“Megjithëse është teknologji e re, nuk do të thotë që duhet të kremi frikë prej saj”, u shpreh ai.
Efektet anësore të vaksinës
Një pretendim tjetër në postimin e Robinson në Twitter, ishte njëra ndër temat më të shpërndara.
Ajo pretendoi se 75 për qind e vullnetarëve kishin zhvilluar efekte anësore pas testimit. Por Pfizer dhe BioNTech nuk kanë raportuar ndonjë shqetësim serioz të sigurisë në testimin e tyre.
“Si të gjitha vaksinat, kjo vaksinë mund të shkaktojë efekte anësore jetëshkurtra, përfshirë dhimbje në vendin e injektimit, ethe, dhimbje muskulore, dhimbje koke dhe lodhje”, tha Penny Ward, një profesoreshë me kontratë afatshkurtër në mjekësinë farmaceutike në King’s College London. /Telegrafi/