Më shumë se 98% e banorëve amerikanë tani jetojnë në një zonë ku ekziston një rrezik “i lartë” ose “i konsiderueshëm” i transmetimit në komunitet i Covid-19, nga 19% e banorëve sa ishte vetëm një muaj më parë.
Sipas mediave të huaja, përcjell Telegrafi, kjo kthesë e mprehtë është nxitur në pjesën më të madhe nga varianti shumë infektiv Delta dhe normat e ulëta të vaksinimit në shumë rajone.
Qendrat për Kontrollin dhe Parandalimin e Sëmundjeve (CDC) matin transmetimin e komunitetit duke përdorur dy metrika – numrin e rasteve për 100,000 njerëz dhe shkallën e pozitivitetit të testit, të dyja të matura gjatë shtatë ditëve të mëparshme.
Kështu, shifrat e fundit nga CDC tregojnë një rritje alarmante të numrit të qarqeve që konsiderohen në rrezik të lartë të transmetimit në komunitet.
Të hënën, 2,361 qarqe në Shtetet e Bashkuara u renditën në nivelin “e lartë”, një rritje e madhe nga 457 qarqe në të njëjtin nivel në fillim të korrikut.
Ndërkohë një vështrim në pesë javët e fundit tregon se sa shpejt është rritur transmetimi i komunitetit në të gjithë vendin.
Sipas një shkrimi të publikuar nga CNN, një zonë me një shkallë të ulët transmetimi ka 10 ose më pak raste për 100,000 njerëz dhe një normë pozitiviteti nën 5%, ndërsa një zonë me një shkallë të lartë transmetimi ka 100 ose më shumë raste për 100,000 njerëz dhe një normë pozitiviteti prej 10% ose më të lartë.
Po sipas shkrimit në fjalë, rritja e transmetimit në komunitet ka çuar në rinovimin e mandateve të maskave dhe një shtytje urgjente për vaksinimet në të gjithë vendin, veçanërisht në zonat ku normat e vaksinimit janë të ulëta.
CDC tani rekomandon që njerëzit të mbajnë maska në ambiente të mbyllura nëse janë në zona me nivele “të konsiderueshme” ose “të larta” të përhapjes, pavarësisht nëse janë apo jo të vaksinuar.
Ndryshe, vaksinat vlerësohen mjeti më efektiv në luftimin e përhapjes së variantit të ri Delta, sipas të dhënave të disponueshme, me studime që tregojnë se të tre vaksinat zakonisht të disponueshme janë në gjendje të parandalojnë sëmundje të rënda ose vdekje nga Covid-19. /Telegrafi/