Kur më shumë se 500 kilogramë marihuanë u zhdukën nga një depo policore në Argjentinë, zyrtarët patën një shpjegim të pabesueshëm: duhet të ishin ngrënë nga minjtë.
Mirëpo, siç shkruajnë mediat e huaja, përcjell Telegrafi, zyrtarët e lartë, me sa duket, nuk ishin të bindur, dhe tetë anëtarë të stafit janë larguar nga puna në lidhje me drogën e humbur.
Siç thuhet më tej, kanabisi ishte në një magazinë për më shumë se dy vjet në një depo të fshehtë në qytetin e Pilar, 35 milje në veri të Buenos Aires.
Por gjatë një inspektimi të objektit në prill të vitit 2017, u zbulua se, prej 6,000kg regjistruar atje, vetëm 5,460kg kishin mbetur.
Një ish-komisar i policisë, Javier Specia, është marrë në pyetje rreth narkotikëve të zhdukur, së bashku me tre oficerë të tjerë.
Pasi të gjithë të katërt i thanë një gjyqtari teorinë e tyre të miut, ministri i sigurisë i Buenos Aires, Cristian Ritondo i largoi ata nga puna, bashkë me katër të tjerë.
“Minjtë nuk do ta ngatërronin drogën për ushqim”, citohet të ketë thënë një zëdhënës i gjyqtarit Adrián Gonzalez Charvay.
“Dhe edhe nëse një grup i madh minjsh që e kishin ngrënë, një numër prej tyre do të gjendeshin të ngordhur në depo”.
Edhe ekspertët mjeko-ligjorë nga universiteti i qytetit ranë dakord se shpjegimi ishte i paimagjinueshëm. /Telegrafi/