Ka ndërruar jetë gjenerali i luftës së UÇK-së, e pastaj edhe i FSK-së, Imri Ilazi.
Kryetari i Partisë Demokratike të Kosovës, Memli Krasniqi në një postim në Facebook shkruan se kontributi i madh i Gjeneral Ilazit për lirinë e Kosovës mbetet i paharruar.
“Me dhembje të thellë mora lajmin për ndarjen nga jeta të personalitetit të shquar, Gjeneralit të Ushtrisë Çlirimtare të Kosovës e të Forcës së Sigurisë së Kosovës, si dhe kolegut tonë në Partinë Demokratike të Kosovës, Imri Ilazi – Komandant Ferri.
Kontributi i madh i Gjeneral Ilazit për lirinë e Kosovës mbetet i paharruar. Si një ushtarak i vendosur dhe një veprimtar i paepur, Imri Ilazi ishte shembull i përkushtimit dhe sakrificës për vendin.
Në këto momente të vështira, u shpreh ngushëllimet më të sinqerta familjes Ilazi, miqve dhe bashkëpunëtorëve të shumtë të të ndjerit.
Lamtumirë Gjeneral!”, shkruan Krasniqi.
Edhe kryetari i Aleancës për Ardhmërinë e Kosovës (AAK), Ramush Haradinaj, ka reaguar pas lajmit për ndarjen nga jeta të Gjeneralit të luftës së UÇK-së, Imri Ilazi.
Haradinaj përmes një reagimi në llogarinë e tij në Facebook, ka thënë se Gjeneral Ilazi ishte shembull i gjallë i guximit dhe përkushtimit të pakompromis për lirinë e vendit.
“Imri Ilazi – Komandant ‘Ferri’. Ai ishte shembull i gjallë i guximit dhe përkushtimit të pakompromis për lirinë e vendit”, ka thënë Haradinaj.
“Pikëllues lajmi për ndarjen nga jeta e Gjeneralit të luftës së UÇK-së dhe të FSK-së, Imri Ilazi – Komandant “Ferri”. Ai ishte shembull i gjallë i guximit dhe përkushtimit të pakompromis për lirinë e vendit. Erdhi nga mërgimi dhe iu bashkua Ushtrisë Çlirimtare të Kosovës duke shërbyer si Zëvendëskomandant në Zonën Operative të Nerodimes. Komandant ‘Ferri’ do të kujtohet gjithmonë si një udhëheqës i patrembur, i ndershëm dhe njeri i fjalës.
Ngushëllime të sinqerta familjes, bashkëluftëtarëve të afërmve dhe miqve të tij!”, shkruan ai. /Telegrafi/
