Përfaqësuesi i Maqedonisë në negociatat për çështjen e emrit, ambasadori Vasko Naumovski pas takimit të sotëm në New York tha se propozimet e dhëna nga ndëmjetësi i OKB-së, Matthew Nimetz janë larg nga zgjidhja dinjitoze.
Sipas tij, korniza për bisedimet është dhënë në Rezolutën 817 të Këshillit për siguri, e ajo është të tejkalohen dallimet rreth emrit. Asnjë shtet, theksoi Naumovski nuk ka të drejtë t’i vendosë një shteti tjetër emër të ri, as OKB ka të drejtë t’i vendos emër të ri një shteti anëtar të saj.
“Shteti ynë ka emër, ai është Republika e Maqedonisë, emri që është në bazën e identitetit tonë. Poashtu, sot në vitin 2018 askush nuk mund ta mohojë ekzistimin e popullit maqedonas dhe gjuhës maqedonase. Nga ana e ndërmjetësit sot u prezantuan disa ide të cilat vlerësoj se janë jashtë kësaj kornize dhe janë larg nga një zgjidhje dinjitoze, por këto propozime do të prezantohet para kreut shtetëror-politik dhe ata duhet të marrin qëndrim në lidhje me këtë çështje”, tha Naumovski.
Përkundër optimizmit që shprehu ndërmjetësi Nimetz në konferencën për shtyp, Naumovski për vete tha se nuk është optimist i madh./Telegrafi/